حب قيد المراجعة دودو محمد

نظرت له بضيق وقالت

فريده :-ما هو علشان كده انا مبحبش أسمى علشان هو اللى اختاره ليا، انت عارف يا بابا احسن حاجه أنه مسافر ومش جاى مع انكل جلال وطنط حنان

وفى ذلك الوقت دوى جرس الباب وفتح لهم الخدم

نهضت فريده من على مقعدها واتجهت إلى الباب وصافحة جلال قائله بترحاب

-اهلا وسهلا نورت الدنيا يا انكل جلال

ثم احتضنت حنان وقالت بحب

فريده :-يااااه يا طنط واحشتينى اوى واحشنى حضنك اللى بحس فيه بحضن ماما الله يرحمها

ربت على ظهرها بحنو وقالت

حنان :-بسم الله ماشاءالله اللهم بارك كنتى قمر وبقيتى قمرين بقيتى نسخه من امك الله يرحمها

ابتعدت عنها وقالت بحب

فريده :-ربنا يبارك فى عمرك يارب اتفضلوا بابا منتظركم جوه

دلفوا إلى الداخل وعندما رأى جلال حاتم اتجه إليه واحتضنه بأشتياق وقال

جلال :-يا راجل يا عجوز تضحك عليا وتقولى انك لسه شباب ده انت سنانك كلها واقعه

تعالت ضحكاته وقال بمرح

حاتم :-ده من غيظك بس بتقول كده علشان أنا لسه شباب عنك

ثم نظر إلى حنان وقال بترحاب

-منوره يا ام فريد اخبار صحتك ايه والله زمان بقالنا كتير اوى مجتمعناش

ابتسمت له وقالت بصوت هادئ

حنان :-البيت منور بأصحابه يا ابو كريم ربنا يديك الصحه ويبارك فى عمرك يارب

تكلمت بسعاده وقالت

فريده :-انتوا واقفين ليه اتفضلوا اقعدوا

نظر له بأشتياق وقال

جلال :-الزمن اتغير يا حاتم مبقاش فيه دوشة عيال ولا ريحة اكل زى زمان ولا الضحكه اللى كانت بتسمع اخر الشارع واحنا بنلعب وبنهزر

نظر له بحزن وقال

حاتم :-ساره اخدت معاها الضحك والسعاده كلها يا جلال البيت بقى كئيب، من يوم ما فرقتنى وانا روحى ماتت جوايا عايش جسد بس

تكلمت بحزن وقالت

حنان :-الله يرحمها كان مافيش حد فى طيبة قلبها كان عندها قبول من عند ربنا غريب

نظر حوله بأستغراب وقال بتساؤل

جلال:-اومال الولا كريم فين بقالى قد ايه مشفتهوش

تعالت ضحكاته وقال

حاتم :-انت لو شوفته دلوقتى مش هتعرفه بقى طول بعرض الجيم اللى بيرحوه ده عامل ليهم عضلات وحاجات غريبه يا اخويا

ابتسمت له وقالت

فريده :-على فكره انا كمان بروح الجيم بس علشان احافظ على جسمى وصحتى الرياضه مفيده جدا حتى للى فى سنكم